November 7, 2022 khan Mizo Academy of Letters (MAL) huaihawtin Archive Hall, Babutlang, Aizawl-ah Postcolonial thlirna atanga Mizo thu leh hla zirna’ seminar chu hlawhtling taka neih a ni a, he hunah hian mi thiam hrang hrang Dr. C. Lalawmpuia Vanchiau, Dr. H. Laldinmawia, Pu B. Lalthangliana, Pu F. Vanlalrochana leh Tv. H. Lalawmpuia te’n paper an chhiar a ni.
Chawhma hun hi dar 10:30-ah neih tan a ni a, Prof. RL Thanmawia, President, MAL-in a kaihruai a, khuallian Pu R. Hmingthanzuala, Director, Art & Culture Department-in thu a sawi a. Hemi hnu hian Dr. C. Lalawmpuia Vanchiau-in ‘Postcolonial Theory: A Tlangpuia Sawi Zauna’ chu a rawn present a, hemi hnu hian Tv. H. Lalawmpuia hnen atangin ‘Postcolonial Theory behchhana Mizo lemchan thlirna’ ngaihthlak leh a ni bawk.
Chawhnu hun hi Prof. Rualkhuma Colney, Vice President, MAL-in a kaihruai a; Pu F. Vanlalrochana hnen atangin ‘Postcolonial thlirna atanga Mizo fiction zir chianna’ ngaihthlak leh a ni a. Hemi hnu hian Pu B. Lalthangliana’n ‘Postcolonial thlirna atanga Mizo chanchin zirna’ sawi lehin Dr. H. Laldinmawia’n ‘Postcolonial thlirna atanga Mizo hla zir chianna’ a present leh bawk a ni.
Hemi hnu hian mi hrang hrang hnen atanga thu tawi sawi te, zawhna leh chhanna hun te neih chhunzawm niin Pi Dorothy Lalnunsangi’n lawmthu sawiin seminar hi khar a ni. Heng mi thiam hrang hrangte paper present hi lehkhabu te-a la tihchhuah leh tum a ni bawk.
0 Comments