Mizo Academy of Letters (MAL) chuan thu leh hla lama chawimawina sang ‘Academy Award 2022’ chu ziaktu ropui L. Keivom hnenah December ni 2, 2022 khan an hlan a. Amah L.Keivom hi 2021 khan a boral tawh avangin a fapa, David Lalhmingsang, Philipines-a awm chuan apa aiawhin a dawng a ni.
Thu leh hla ziakmi langsar leh hmingthate tana chawimawina sang ‘Academy Award’ hi kum 1979 aṭang khan sem ṭan a ni a, Pu L.Keivom nen hian mi 14 in an dawng tawh a, a dawngtu zingah hian boral hnu (posthumous)-a dawng mi pathum Rev. Dr.Zairema, KC Lalvunga (Zikpuii pa) leh L.Keivom ten an dawng tawh a ni.
Pu L. Keivom hian Mizo ṭawngin lehkhabu 13 a ziak a, chung zingah chuan Zoram Khawvel vol 1-8, Bawktlang Thawnthu, Pherzawl Titi leh a dangte a ziak a. Hmar ṭawngin lehkhabu 7 leh article 1200 chuang a ziak a ni. Heng a lehkhabu leh a thuziak ṭha tak tak avang hian ‘Academy Award 2022’ hi pek a a ni.
Pu L .Keivom nupui Pi Dari hi kum 2020 khan a boral a. Fa 4 an nei a, an fa upa ber Margaret Lalthangmawii hi fashion designer niin London-ah a awm a, a nau Helen Singpui hi New Zealand-ah a awm a, a fapa pakhat David Lalhmingsang hi Philipines-ah a awm a, a naupang ber James Lalropui hi New York-ah awmin international photo journalist a ni nghe nghe.
Academy Award hlanna inkhawm, Pi Zaii Hall, Synod Conference Centre-a neih hi MAL president Prof. RL Thanmawia chuan a kaihruai a, Award dawngtu aiawh hnenah Dr. ZR Thiamsanga, MLA chuan lawmpuina thuchei, Tangkapui leh pawisa fai Rs. 20000 a hlan a ni. He Award semna inkhawmah hian ziak mi langsar tak tak, Award ropui tak tak lo dawngtu, MAL member te leh Pu L. Keivom fate, chhungkhat leh ṭhian ṭhate an tel hlawm a ni.
L.Keivom hnena chawimawina thuchei (citation)-ah chuan heti hian a in ziak a – Zofate bengtivar a, ngaihtuahna leh suangtuahna tizauva, Zohnahthlakte inpawhtawnna leh inunauna kawnga thu ṭangkai leh hlu tak tak a ziak ṭhin a, chuvangin L.Keivom hnenah he chawimawina Academy Award 2022 hi hlan a ni’ tia ziak a ni.
0 Comments