Mizo Academy of Letters (MAL) kum 60 tlinna, Diamond Jubilee lawmna pui ber chu neih a ni dawn ta a, November 25-29, 2024 chhungin hmun hrang hrangah neih a ni ang.
November 25, 2024 chhun atangin Vanapa Hall bathlarah Pho Chhuah Runpui hi neih tan a ni dawn a. A hawnna inkhawm tawi neihah Prof. RL Thanmawia, President chuan hun kaihruaiin H. Lalawmpuia, Pho Chhuah Runpui Committee Secretary chuan report a pe ang a, Prof. Laltluangliana Khiangte, Donor Member, MAL chuan Pho Chhuah Runpui hi a hawng ang. Hemi hnu atangin ni tin man tlawm zawkin lehkhabu hrang hrang lei theih a ni ang.
November 28, 2024 zan dar 7:15-ah International Webinar neih a ni leh dawn a, ‘Biakhmuhtheihna Hmanga Thupui Zir Ho’ tiin he hun hman tur hming vuah a ni. Dr. Laltleipuii, Member, Chhuahtu leh Tlangau Sub-Committee chuan hun a kaihruai ang a, Prof. RL Thanmawia’n thupui sawi hawngin, Pu Lalrammawia Ngente, Pu VLC Vanlalhriatrenga leh Dr. Krista Roluahpuia te’n Mizo Thu leh Hla Dinhmun leh Hmasawn Zel Dan Tur hmangin thupui an sawi ang. He hun hi Zoom emaw, Google Meet emaw kaltlanga neih tur a ni.
November 29, 2024-ah Pi Zaii Hall, Synod Conference Centre, Sikulpuikawnah a lawmna pui neih a ni leh dawn a, chawhma dar 10:30-ah tanin Lalduhoma, Chief Minister chu khuallian niin Pu C. Lalsawivunga, Minister, Art & Culture Department chu khualzahawm a ni ang. Chawhma lamah hian member chatuan ram pan tate sunna hun te, MAL Jubilee puala intihsiak chi hrang hrang lawmman puan leh semna hun te, MAL chanchin thlir hona leh Jubilee lehkhabu tlangzarh bakah hruaitu hlui chawimawina neih a ni ang. Chawhnu hunah hian Ziak Mi kawmna hun neih a ni dawn a: Dr. R. Zothanliana, EC Member-in B. Lalhriattira, Lalhriata, H. Lalngurliani, TC Jonunsanga, Samson Thanruma, Dr. Chawngkhuma Chawngthu leh C. Lalhmingmawia (Mus-a) a kawm ang a; chumi hnuah Thangthar Ziak Mi Kawmna neih leh niin Dr. H. Laldinmawia, Asst. General Secretary-in Rodinpuii (rdp), Vanlalhmangaihi (Ahmangaihi Khiangte), Olivia Remsangpuii, Ruth Khawlhring, Lalvensangi, K. Lalchhuansangi, Chhantea Pautu, VL Muanpuia Chawngthu leh JH Lalrinzuala te a kawm ang.
Heng hun pawimawh tak takte hman zawh hunah Jubilee ruai kil ho tur a ni bawk. MAL member te, thu leh hla lama tui zawng zawngte lo tel theuh tura sawm an ni e.
0 Comments