Mizo Academy of Letters (MAL) chuan vawiin November ni 29, 2025 (Inrinni) khan thu leh hla lama thawhhlawkte hnena kum thum dana chawimawina sang an pek thin, ‘Academy Award’ chu Revd Dr. Chuauthuama (L) hnenah an hlan a. Revd Dr. Chuauthuama aiawhin a nupui Pi Lalchhumi hnenah Assembly Speaker, Pu Lalbiakzama chuan chawimawina hi a hlan a ni.
MAL chuann vawiin khan Mizoram Legislative Assembly Annexe Building-ah ‘Kum Tawp Inkhawmpui’ an hmang a. He inkhawma khual lian Pu Lalbiakzama, Mizoram Legislative Assembly Speaker chuan Revd Dr. Chuauthuama hnenah Academy Award hi a hlan a. Hemi rual hian MAL Thu leh Hla Chanchinbu kum 60-na special issue te, Dr. Darchuailova Renthlei lehkhabu ‘Tlang Thawveng 2’ leh Nl. Lalsangpuii lehkhabu ‘Lawhlei’ tih chu a tlangzarh bawk.
MAL inkhawmpui chawhma inkhawm hi Vice President, Prof. Rualkhuma Colney chuan a kaihruai a. Khual lian Pu Lalbiakzama chuan, Mizo thu leh hla hmasawnna atana MAL hnathawh chu ropui a tih thu te, kum tina lehkhabu chhuak tha ber ‘Book of the Year’ leh thu leh hla lama thawhhlawkte hnena ‘Academy Award’ an hlan thin te chu ropui a tih thu a sawi bawk.
Academy Award dawngtu Revd Dr. Chuauthuama fanu Dr. Elsa Lalramzauvi pawhin thu sawiin, ‘Academy Award’ a pain a dawng chu ropui a tih thu leh a pa khan hre ve se a thil ngaihhlut ber zinga mi a nih a rin thu sawiin, “Ka pa thu min chah thin dikna hi ram leh khawtlangah i chawi sang zel ang u’ tiin a sawi a ni.
Academy Award hi kum 1979 atang khan hlan tan a ni a. Boral hnu (posthumous) hian mi pathum – KC Lalvunga (Zikpuii Pa), Rev. Dr. Zairema leh Pu L. Keivom te hnenah hlan a lo ni tawh a. Revd Dr. Chuauthuama hi a boral hnua he chawimawina dawng thei palina a ni.
Chawhnu rorel inkhawm chu an pawl President Prof. R.L. Thanmawia’n a kaihruai a, report hrang hrang ngaihthlak a nih bakah MAL chhunga hman tur bik Mizo thumal hrang hrang chhawpchhuahte chu inkhawmpui hian a pawm a. An pawl hming, Mizo Academy of Letters’ tih pawh “Mizo Thu leh Hla Inpui’ (MIzo Academy of Letters) tia vuah tura rel chu an pawm bawk a ni.
Mizoram Journalist Association kaihhruaina hnuaiah kum 2025-2027 chhunga MAL hruaitu tur an thlang nghal a. President-ah Prof. R.L Thanmawia, Vice President-ah Prof. Rualkhuma Colney, General Secretary-ah Dr. Zoramdinthara, Asst. General Secretary-ah Dr. H. Laldinmawia, Treasurer-ah Dr. Dorothy Zonunsangi leh Finance Secretary-ah Nl. Lalsangpuii te an thlang bawk a ni.
0 Comments