MAL Book of the Year 2025 Report

 Kum 2025  chhunga lehkhabu  chhuak lak khawm theih zat hi bu 223  a ni a.   Chuta tang chuan Top 20, Top 10 leh Top 3 thlen chhuah niin, Top 3 atang hian uluk taka ngaihtuah a nih hnuin, Kham leh Suar Novel, Lalrammawia Ngente ziah chu lehkhabu tha ber atana thlan a ni ta a ni. 

 1. Top 20 

Hemi atan hian lehkhabu 223 zing atangin tehfung hrang hrang hmangin 20 thlan chhuah an ni. Chungte chu

• A lai taka mihring (Mahni inpathianna) – Lalnghakmawia Khiangte (Philosophy)
• April Fool – Nununa Renthlei (Novel)
• Bei nge sei run dung – B. Lalhriattira (Novel)
• Chhuk leh Chho – Lalhruaitluanga Chawngte (Narrative Biography)
• Hetiang chanchinte hi chhiar ila – R. Lalrinfela (Inspirational non-fiction)
• Hmeithai Lehkhathawn – Janis Hnamte (Memoir)
• Hripui Leng Karah – Lallawmzuala (Fictions)
• Kham leh Suar – Lalrammawia Ngente (Novel)
• Kawihṭhuang – Rohmingthanga Ralte (Criticism)
• Khawtlang Darzam – Romuanpuii Zadeng (Journal)
• Khualzin Kamliam – Rsa Thawmte (Poetry)
• Kohhran Chanchin – Pastor Bena (Church History)
• Lalruanga Dawi Bur – K. Vanlalneiha (Novel)
• Mizo Lal Zakapa – Laltluangliana Khiangte (Drama)
• No Chanve – Paul Lalsangliana (Memoir)
• Riahrun Remna – Mafaa Hauhnar (Essays)
• Tukchhuah Nuam le 3 – RK Lianzuala (Journal)
• Ubuntu – H. Lalroluahpuia (Essays)
• Vangvat Kai Lo – Commissioner Lalkiamlova (Memoir)
• Zo Daifim – TC Jonunsanga (Criticism)

 2. Top 10

Top 20 atang hian uluk lehzuala thlifimin, hengte hi Top 10 atana thlan chhuah a ni

 1. APRIL FOOL - Zaiva Nununa Renthlei

Mizoram chanchin, kum 2086-a thil thleng.  Science Fiction thawnthu changkang tak.

2. A LAI TAKA MIHRING - Lalnghakmawia Khiangte

Mizote tana Philosophy concept hranpa chaina hmasa. Mihring nunphung, ama mihrinna leh Pathian inkar thuk taka zirchianna leh zawhna chhanna zawnna a ni.

3. BEI NGE SEI RUN DUNG - B. Lalhriattira

China rama innghat, Trans-national fiction danglam tak. Adventure leh Eco-Fiction, character leh dialogue thiam taka rem khawm a ni.

4. HRIPUI LENG KARAH MITTUI - Lallawmzuala

Phek 275-a chhah, thawnthu tawi 5 dahkhawmna. Nula leh tlangval inhmangaihna lam hawi, ṭawngkam mawi leh lungrun taka phuah chhuah a ni hlawm.

5. KAWIHTHUANG - Rohmingthanga Ralte

Literary criticism lam hawi lehkhabu pawimawh. Pi Hmuaki aṭanga tunlai hla leh essay thlengin chik taka thlirna leh zirna ngaihnawm a ni.

6. KHAM LEH SUAR - Lalrammawia Ngente

Social novel tha tak. Nun chhia leh tlu sawp tawh pawh Pathian hmangaihna dik takin a tuam dam leh theihzia tar lanna thawnthu lungkuai tak a ni.

7. KHAWTLANG DARZAM - Romuanpuii Zadeng

Essay tawi 53 chilh khawmna. Hmeichhe tam tak, a bik takin nuthlawite tawh thin chhaih nawmnahna leh an dinhmun tar lanna thuziak a ni.

8. KOHHRAN CHANCHIN - Pastor Bena

Mizo ṭawnga Church History kan neih tawh zinga kimchang leh rintlak ber. Secular history thleng pawha rawn tlak, lehkhabu chhah leh hlu a ni.

9. MIZO LAL ZAKAPA - Laltluangliana Khiangte

Historical play, classical drama ziarang nei. Plot leh setting ṭha chungchuang, Mizo lemchan chhuak tawh zinga belhchian dawl leh quality ṭha pawl tak  a ni.

10. ZO DAIFIM - TC Jonunsanga

Mizo hla, ṭawng, leh culture fak mawina lam essay. Mizo khawtlang nun hmathlir leh zir zauna ngaihnawm tak a ni.

 3. Top 3

Kum 2025 chhunga Mizo lehkhabu chhuak hrang hrangte uluk taka thlitfim a nih hnuah, heng lehkhabu pathumte hi Top 3 atan thlanchhuah a  ni. Heng zingah hian Fiction pahnih leh Drama pakhat an awm a ni.

 1. APRIL FOOL (Science Fiction)

Ziaktu: Zaiva Nununa Renthlei

Mizo literature-ah Science Fiction (Sci-Fi) lamah hian kan la pachhe hle a, mahse he lehkhabu hian chu huang chu a rawn zauh a ni.

• Setting: Kum 2086-a innghat niin, Mizoram chu mahnia ro inrel ram (Sovereign state), khawvel changkang ber berte el phak khawpa zalen leh changkang a ni.
• A Plot Tlangpui: Lunghlu kawng bo vanga buaina karah, a chhartu Rema chu thi  anga awmin 'Kima' angin a rawn inlan leh.
• Thiamna Leh Finna: He thawnthuah hian lei hnuai khawvel (underground world), bullet train, leh nuclear sawngbawlna hmun thlengin Mizo kut chhuak a ni.  Hmanraw hman leh inbiak pawhna hmanruate hi Science tehna atang pawha rintlaka ziah a ni.

2. KHAM LEH SUAR (Social/Christian Novel)

Ziaktu: Lalrammawia Ngente

He lehkhabu hi Kristian Novel emaw, Social Novel huang chhunga khung theih a ni a, mihring nun thuruk leh khawtlang nun harsatna tar lanna hlu tak a ni.

• Nun Inthupte: Pu Siama nun tlawh chhanin hmeichhe pathum chanchin min hmuhtir a. Remsangi, nawhchizuar nun thim atanga hmangaihna dik vanga a rawn chhuah leh dan hian  lung a kuai hle.
• Zirtirna: Zu leh mipat hmeichhiatna ngaihzamna hian nun a tihchhiatzia te, uirena vanga chhungkaw kehchhia leh thihna hial a thlen dan te chiang takin a tar lang.
• Beiseina: Eng ang pawha tlu chhia leh nun chhe tawh pawh, Pathian a\anga chhuak hmangaihna dik tak chuan a tuam dam leh thei a ni tih hi a thuchah lian ber a ni.

3. MIZO LAL ZAKPA (Historical Play)

Ziaktu: Laltluangliana Khiangte

History behchhana ziah ni mah se, lemchan (Drama) ziarang tling taka ziak a ni a, Mizo lemchan chhuak tawh zingah chuan a "Class" a sang hle.

• Plot, Setting, leh Dialogue-ah a tha em em a, Classical Drama ziarang nei thlap a ni. Technical zawng pawha teh hian Mizo lemchan chhuak tawh zingah a belhchian dawl ber zinga mi a ni.
•  Hard bound-a siam a ni a, a lehkhabu paper quality a thain, chhut sual (typo) a awm mang lo a, a ziaktu hian Mizo tawng a hmang thiam hle bawk.

---

 Book of the Year 2025

Kum 2025 chhunga Mizo tawng lehkhabu chhuak hrang hrangte thliar hna thawh a nih hnuin, Lalrammawia Ngente novel ziah, ‘Kham leh Suar’ chu Book of the Year 2025 atan thlan a ni. He lehkhabu hian Mizo literature-ah social reform leh psychological realism thiam takin a phiar kual a, chhiartute thinlung hneh thei taka  ziah a ni. 

ENG VANGA THLAN NGE A NIH?

A. Social Reform & Psychological Realism

Lalrammawia hian khawtlang siam thatna (Social Reform) hi mihring chhungril nun luhchilhna (Psychological Realism) nen a rawn la kawp a. Maremi, Chhantei, leh Remsangi te nun kal tlangin, uirena leh chhungkaw kehchhia-in mihring psyche-ah ‘Kham’ hlauhawm leh ‘Suar’ bumboh a siam dan chu ngaihnawm takin a rawn chhawp chhuak a ni.

B. Existential Void leh Ethics

Philosophy thlirna atangin, he novel hian Jean-Paul Sartre-a 'Existential Void' (nunna ruakna) a rawn luhchilh a. Maremi nun tawt leh ruak, sual khura a luhchilh tak dan hi huatna ni lovin, lainatna leh hriatthiamna (empathy) nena thlir turin chhiartute a chawk tho a, hei hian literature hlutna ‘humanity’ a tar lang chiang hle.

 C. Archetype Character

Mizo fiction-ah thil thar rawn thlenin, 'The Wise Old Man' archetype kan tih mai, Pa Siama character hmangin hruaitu leh zirtirtu pawimawhzia a rawn nemnghet a ni.

D. Spiritual Realism leh Healing

He novel hian 'Placebo Effect' leh 'Bibliotherapy' hna a thawk a. Beiseina hlu tak a rawn tuh a, sual khur thim ber atang pawha Pathian hmangaihna hna thawh avanga nun hlawhtling a lo awm dan a tar lang a. Literature hi thlarau leh rilru tihdamna hmanrua a nihzia a rawn nemnghet a ni.

THIL DANG

Lehkhabu ziaktu Naupang ber hi kum 10 mi chauh a ni. “I Nun Thlak Danglam Turin (Naupang Thawnthu Tawi 30 - Zawhna leh Chhanna Nen)" tih bu a ni a, a ziaktu hi Easter Lalpekhlui a ni.

Sakhaw lam lehkhabu a chhuak tam ber a. College hrang hrangin seminar an buatsaih chumi bu chilhkhawm chu a tam bawk.

Book of the Year 2025 Committee Member-te:

Chairman : Dr. H. Laldinmawia

Secretary : F. Vanlalrochana

Members: Prof.  Vanlalhruaia

Dr. Lalrammuana Sailo, Laltlanmawia

 A tira Chairman tura ruat Prof Rualkhuma Colney leh Secretary Dr. R. Zothanliana te chu term laklawh laiin an chawl.

Views: