Aizawl the 23rd April, 2022: Mizo Academy of Letters (MAL) Foundation Day chu vawiin khan Assembly Annexe Conference Hall-ah hman a ni a, Pu Zoramthanga, Chief Minister, Mizoram chu khuallian niin Pu Lalrinliana Sailo, Assembly Speaker chu khualzahawm a ni.
He huna khuallian Pu Zoramthanga chuan Mizo Academy of Letters website a tlangzarh hnuah MAL member Lalbiakzami hla bu Biakzami Biahzai a tlangzarh a. Hemi hnu hian thu sawiin, rambuai avanga economy chauh ni lo, literature thlenga Mizoramin a tuar dan te, hun lo kal zela hma kan sawn dan leh vawiin thlenga hrileng leh harsatna hrang hrang karah Mizo literature tui leh hmasawnna duhtu thahnem tak an awm chu lawmawm a ti a. Thu leh hla thiam chu thil awlai lo tak, mi nazawngin thiam thil a nih loh dan te, hnam ziarang humhalhnaah te, hnam tawng tihhmasawn leh zirchianna kawnga thu leh hla lama kan mi thiamte pawimawhna Chief Minister hian a sawi a. Ram hmasawnna thlenga an pawimawhna sawiin Chief Minister chuan ziakmite chu an thuziahah a êng lam, a ‘positive‘ zawnga ziak thin turin a chah a. Khuallian hian Hnam Ropuite U Tho R’u Le ziaktu Lalhruaitluanga Chawngte hnenah Book of the Year 2021 lawmman a hlan nghal a ni.
Khualzahawm Pu Lalrinliana Sailo, Assembly Speaker chuan ziakmi kalkhawmte chu mi chhuanawm tak tak an nih thu sawiin, ram siamthat kawngah pawh an pawimawh a tih thu a sawi a. Ziak leh chhiar a tui mite, chhiar zau tak takte hi eizawnna kawng hrang hrangah pawh râwn tlak an nih fo thu a sawi a. Zonun ze mawi chhawm nun zel pawimawh a tih thu sawi telin, kan thu ziak, a bik takin social media lama thu kan vawrhdarh danah inen let ngai tam tak awm nia a hriat thu a sawi bawk. Hemi rual hian khualzahawm hian MAL member C. Lalaudinga lehkhabu Khawvel Indopui 2-na te, B. Lalthangliana lehkhabu Mizo hla leh a phuahtute leh Lalthangfala Sailo lehkhabu Mizo Nun Hlui – Lemchan Pathum te a tlangzarh nghal a ni.
He hunah hian MAL Life Member thar mi panga — H. Lalbiakzuali, Maubawk; Dr. C. Lalawmpuia Vanchiau, Ramhlun South; C. Laizawna, Ramhlun North; Dr. Zoramdinthara, Dam veng leh Laldova, Chanmari, Aizawl te hnenah thuziak hlan a ni a, member lo ni tawh sa Lalremmawia Sailo, Saitual hnenah hlan a ni bawk.
MAL Foundation Day lawmna inkhawm hi MAL President Prof. RL Thanmawia chuan kaihruaiin, Dr. Zoramdinthara, MAL Secretary leh Lalzarzova, Secretary, Book of the Year 2022 Committee hnen atangin report ngaihthlak a ni a, Lalhruaitluanga Chawngte, Book of the Year 2021 dawngtu hnen atangin thusawi tawi ngaihthlak a ni bawk a ni.
Kumin hi MAL dinchampha vawi 58-na a ni a, a lawmna hunah hian Mizoram chhung leh pawn atangin MAL member leh, MAL-a inziak lut bakah MAL thawhpui pawl hrang hrangte an kal khawm a ni.
0 Comments