Kum 2021 chhunga Mizo lehkhabu chhuak tha ber, Book of the Year 2021 atan Lalhruaitluanga Chawngte lehkhabu Hnam Ropuite U, Tho R’u Le tih chu thlan a ni a, Lalhruaitluanga Chawngte lehkhabu ziak, Book of the Year atana thlan pahnihna a ni.
Mizo lehkhabu chhuak tha ber hi Mizo Academy of Letters (MAL)-in kum tinin a thlang thin a, nikum 2021 pawh khan Mizo lehkhabu chhuak 170 zet chu la khawmin chung zinga a tha zual 20 thlan chhuah a ni a. Top 10 thlan chhuah leh niin Top 3-a thlit fim leh a nih hnuah Lalhruaitluanga Chawngte ziak hi thlan a nih thu, April 22, 2022 khan tihchhuah a ni ta a ni.
Ziaktute zingah hian Book of the Year lawmman vawi khat aia tam dawng thei hi mi pali an lo awm tawh a — B. Lalthangliana (1989 & 1993), C. Laizawna (1990 & 1998), Lalhriata (2005 & 2008) leh C. Lalnunchanga (2006 & 2015) an ni a, Lalhruaitluanga Chawngte hi a pangana niin kum 2016 khan Aizawlah Aizawler chu Book of the Year atana thlan a lo ni tawh bawk.
Book of the Year lawmman hi April 25, 2022-a MAL Foundation Day, Assembly Annexe Conference Hall, Legislative Assembly-a hman turah hlan a ni ang.
0 Comments