MAL 58th Foundation Day Report

A hun : Ni 25.4.2022 (Thawhtanni) 11 :00 Pm -12:30 Pm

A hmun : Conference Hall, Assembly Annexe

Pu Chairman, MAL President, Prof. RL Thanmawia, kan Khuallian zahawm tak Pu Zoramthanga Chief Minister, Khual zahawm Pu Lalrinliana Speaker, Book of the Year 2021 dawngtu Tv. Lalhruaitluanga Chawngte, Affiliated Club, Book of the Year 2021 lawman tumtu Pu Lalngura fate, Chanchinbu mite, MAL Puipate, Sr.Advisers, Donor Members, EC Members leh MAL Member dang lo kalte leh thian duhtakte u, MAL hmingin MAL din champha chibai ka buk a che u.

Kum 2021 kum tawp Annual Meet kan hman inkarah pawl chet velna a tam vak hman lova. Hripuiin kum hnih teh meuh min chenchilh hnuah vawiina MAL din champha Chief Minister zahawm tak Pu Zoramthanga leh Speaker zahawm tak Pu Lalrinliana Sailo te hova kan hmang thei hi a lawmawm tak zet a. Hri leng leh sawrkar thu, SoP hnuaia awm kan ni tih inhre chungin fimkhur turin kan inchah nghal a ni. Kan boruakin a la zir hrih loh avangin thupui zir bing leh thil dang kan hman thin kha kan zep tel thei ta lo a ni. Engpawhnise, a lo kalte chuan hlim tak leh uar taka hman theuh kan tum dawn nia.

1. Mizo Academy of Letters (MAL): Mizo Academy of Letters (MAL) hi Mizo thu leh hla tiphuisui a,tawng tihmasawn a, tichangtlung tur leh Mizo nunphung leh ziarangte humhalha vawng nung zel turin, ni 23.4.1964 khan din a ni. Tunah hian Donor member 3, Life member 58 awmin mi pakuate chuan mual an liam tawh a. Tin, member 367 an awm bawk. MAL hian a hnuaia inziak lut, thu leh hla lama MAL sangawizawnpui pawl hrang hrang a nei a. Chung te chu- MAL Joint Headquarters; Lunglei, Mizo Writers Association, SEDAL, Ramhlun Literature Club, Chhimtuipui Academy of Letters, Saitual Literature Club, Lawngtlai Academy of Letters leh Letpanchhawng Duhlian Literature Club, Myanmar te an ni. Anni nen hian MAL thil tumte tihlawhtling turin hna a thawk mek a ni.
   
2. MAL hruaitute: MAL hruaitu tur hi kum hnih danah thlan thin a ni a. Kum 2021- 2023 chhunga MAL hruaitute chu December ni 18, 2022 khan thlan an ni a. Tuna MAL hruaitute chu :
   President : Prof. R.L Thanmawia
   Vice President : Prof. Rualkhuma Colney
   Secretary : Dr. Zoramdinthara
   Jt. Secretary : Dr. Darchuailova Renthlei
   Treasurer : Nl Lalsangpuii
   Fin. Secretary : Pu Lalhmingmawia Ralte Puipate bakah Senior Adviser 5 leh EC Member 15 awmin, Doner member pakhat nen, Executive Council-ah mi 27 an awm mek.
   Executive Member-te chu: i) Pu Rozama Chawngthu ii) Revd. Dr. Chuauthuama iii) Commr. Lalkiamlova iv) Pu C. Laizawna v) Pu C. Lalnunchanga vi) Nl Zaithangpuii Vuangtu vii) Pi Dorothy Zonunsangi viii) Pu Lalzarzova ix) Pu Zothansanga x) Dr. Lalawmpuia Vanchiau xi) Dr. H. Laldinmawia xii) Pi H. Lalbiakzuali xiii) Pu Lalrammawia Ngente xiv) Tv. H. Lalawmpuia xv) Dr. Lalhlimpuii
   
   
   Doner member aiawh : Prof. Laltluangliana Khiangte

3. Ni 18 December 2021 khan MAL kum tawp intawhkhawm chu Synod Conference Centre Aizawlah tluang taka neih a ni a. He MAL intawhkhawm hi chawhma leh chawhnu hunah then a ni a. Chawhmaah hian Book of the Year 2020 lawmman chu ‘Eng Nge I Zawn’ tih ziaktu Dr. Rema Chhakchhuak hnenah khuallian Pu L Thangmawia MLA, Vice Chairman, Human Resources and Development Board chuan a hlan a. Dr. Rema Chhakchhuak hi rawngbawlna avanga New Delhi lama a awm rih avangin a aiawhin Dr. KL Remsanga’n Book of the Year 2020 lawmman hi a dawng a ni. Khuallian hian Prof Laltluangliana Khiangte President MAL lehkhabu pahnih ‘Zo Lungthu Pathum’ leh ‘Writings in Mizo Manuscript’ bakah Pu B. Lalthangliana, MAL Senior Adviser lehkhabu ‘Mizo Chanchin’ tih chu a tlangzarh nghal bawk a ni. Covid 19 hripui leng kara he hun hi hman ni mah se, MAL member bakah Book of the Year 2020 lawmman dawngtu chhungte nen mi sawmriat vel zet kan kal thei a ni. Chawhnuah hian Mizoram Journalist Association hruaitute kaihhruaiin kum 2021 – 2023 chhunga MAL hruaitu tur thlan nghal a ni.
   
4. Lehkhabu dawn: MAL hian mi mal thahnemngai leh thilphalte hnen atangin lehkhabu, Book of the Year Committee pual bik emaw, MAL Library pual bik emaw kan dawng thin a. Report huam chhunga Library-a dah tura lehkhabu kan dawnte leh a petute chu hengte hi a ni. Lekhabu hming Petu
   1) Vaphai Lui Thuruk – Pu Lalthuamliana, Myanmar
   2) Mizoram leh Assam Ramri Buaina – Lalthuamliana, Ramthar Veng
   3) Puan Dum Zarna – Hminga Tlau
   4) Chhimbal (Thuziak intihsiakna Top 30) – B. Hrangthana (2 copies)
   5) Dr. C. Silvera Chanchin – K.Lungruala
   6) Ram Bawhchhiatna leh Zawkneite Thu – C.Zathuama
   7) Caram Deo leh kum 62 tlinna thilpek – Dr. Rualthankhuma Renthlei MS (ENT)
   8) Mizo Tawng Inhnial Thinnate – Rozama Chawngthu
   9) Rambuai Novel Zonunsangi – T.C Jonunsanga
   10) Awmkhawhar Biahzai – Lalruatkimi
5. Grant in Aid chungchang : Kum kal ta Financial Year, 2021-2022 chhung khan Art & Culture Department kaltlangin, sawrkar atangin Grant in Aid Rs. Nuaihnih (Rs.2 lakhs) kan hmu a, kan tawngkaipui hle a. Theih nise chuan hei aia tam daih kan mamawh hle.
   
6. Book of the Year lawmman tum sak thu:
   Hun kal tawhah khan Book of the Year lawmman, tangka hi mi mal thahnemngai ten min tum sak zauh zauh tawh a Nikum khan, Pu Lalngura, 1991-a boral ta hriat reng nan, a fapa, Pu PC Rodingliana, Durtlang Leitan Veng leh Pu PL Liandinga (MAL Life Member) Khatla South ten ‘Book of the Year’ lawmman hi tum an inhuam thu MAL-in a dawng a. Anni unau hian lawmman hi an theih chen chen tum zel an inhuam a, chu chu MAL pawhin lawm takin rem a ti a. Tuna, kan pek tur Book of the Year 2021 hi an vawihnih tumna tur a ni. Hetianga Pawl tana mi inphal leh pawl thil tih ngaihlutu hi MAL tan an hlu tak zet a ni.
7. MAL Puipate pawh hripui leng karah online hmangin an thukhawm ve thin a. Ni 4.03.2022 Zan dar 8:00 khan MAL Puipate chu MAL Foundation day hman dan tur leh tul dangte thlir lawkin Online (Google meet) hmangin an thukhawm nghe nghe.
   
8. Ni 22 December 2021-a puipate thukhawm chuan Mizo Language Development Board lo piang tur leh MAL kaihnawih chungchangah Chief Minister, Mizoram chu hmuh nise a tih angin Chief Minister zahawm tak leh MAL Puipate chu January ni 6, 2022 chhun dar 12:00 khan tha takin an inkawm ho thei a. Chief Minister hian tha takin MAL puipate thu leh hla hi a lo dawngsawng nghe nghe. MAL Puipate hian an kutchhuak lehkhabu an ken khawm chu Chief Minister hi an hlan bawk a ni.
   
9. Ni 17.02.2022 khan Central State Library-ah Thu leh Hla Bind kum 2019 bu 150 leh kum 2020 bu 180, avaiin bu 330 kan theh lut a. Art and Culture lam thuneitute hian a tirah kum 2019 chhuak Thu leh Hla Bu 150 chauh an lak theih tur thu an sawi hnuah Director leh Joint Director te kan bia a. Vanneihthlak takin kum 2020 Thu leh Hla hi min laksak leh thei hlauh a. Art and Culture hotuten kan dinhmun an hre thiam thin a, a lawmawm hle.
   
10. Mizo Language Development Board din anih avangin MAL in lawmthu a sawi: MAL chuan hun rei tawh tak atanga a lo vei tawh, Mizoram Eight Legislative Assembly 9th Session-in lungrual taka Mizo Language Development Board bill 2022 a pass ta hi Mizo Academy of Letters chuan lawmawm a ti takzet a. Kum tam tak Tlumtea thlir a nghakhlel taka kan lo thlir thin chu a tak a chang thei dawn ta a. Hnam pumpui tan hmasawnna rahbi pawimawh tak, thang leh thar lo la awm zel tur tana ro tling, chhinchhiah tlak, hriat reng tur a ni ngei ang. Kan sawrkar chungah leh MLA zawng zawng chungah te, MLB bill put luh a nih theih nana theih tawpa tan latu zawng zawngte chungah tih tak zet a lawm thu chanchinbu lamah pawh kan chhuah nghe nghe.
    
11. Academy Award 2022 Committee: Kum 2022 kum tawp intawh khawm hi MAL-in ziakmite hnena chawimawina sang ber a hlan thin Academy Award hlan hun a lo nih leh tak a vangin hetiang hian ‘Academy Award 2022 Committee’ a din.
    Chairman : Pu B. Lalthangliana
    Secretary : Dr. H. Laldinmawia
    Member : 1. Prof Rualkhuma Colney
    2. Comm’r Lalkiamlova
12. “Thu leh Hla”-a ISSN neih chungchang: “Thu leh Hla”-a article thawhtute, a bik takin College leh University zirtirtute leh research scholar-te kai sanna leh hna hmuhna atan, ISSN number hi a pawimawh thin avang leh chanchinbu hmasawnna kawng khat a nih avangin “Thu leh Hla” hian ISSN nei turin Editorial Board-in a lo bawhzui zel a ni.
    
13. MAL Website neih chungchang: Mizoram leh ram pawn lam ten MAL chanchin leh a chet velna hrang hrang te awlsam zawka an lo hriat theih nan MAL Website neih tul EC chuan a ti a. A tul anga website lo siam a, enkawl turin IT Cell din niin, anni hian hun reilote chhungin Website changtlung tak an rawn siam thei a. MAL Website chu mizoacademyofletters.com tih a ni. Heng a hnuaia mite hi IT Cell Member-te chu an ni.
    Chairman : Secretary, MAL
    Secretary : Pu Lalzarzova
    Members : Dr H Laldinmawia
    Tv H. Lalawmpuia
    Tv KC Lalthansanga
14. Book of the year 2021 Committee leh lawmman : MAL chuan kum 1989 atang khan kum tin Mizo irawm chhuak lehkhabu zinga tha ber ‘Book of the Year’ a thlang thin a. Book of the Year hian lawman hi Rs.10000/- Chawimawina thuchei (Citation) bakah Thu leh Hla kum khat chhung, a thlawna pek an ni bawk. Kum 2021 chhunga chhuak zing atang pawhin thlan leh a ni a. A thlangtu Committee chu:
    Chairman : Dr Zoramdinthara
    Secretary : Lalzarzova
    Members : Dr H. Laldinmawia
    Dr Lalhlimpuii
    Vanlaltana Khiangte
15. Thu leh Hla Editorial Board thar: Kum 2022-2023 chhunga Thu leh Hla Editorial Board thar ruat a ni a, Board thar hian January 2022 atangin an thawk tan a ni.
    Chungte chu:
    Editor : Revd. Dr. Chuauthuama
    Jt.Editors : C. Lalnunchanga
    Dr. H. Laldinmawia
    Thu leh Hla hi phek 48, bu 1600 a ni a. A man hi a bu mal Rs 20, kum khat lak man Rs 200/- a ni bawk.
16. Member tharte : Kum 2021 Annual Meet leh vawiin inkarah MAL Life member panga leh member thar 10-in min belh a. Chungte chu-
    Life member:
    1) Laldova, Chanmari Aizawl
    2) Dr. Zoramdinthara, Dam Veng, Aizawl
    3) Pu C. Laizawna, Ramhlun North, Aizawl
    4) Dr. Lalawmpuia Vanchiau, Ramhlun South, Aizawl
    5) Pi Lalbiakzuali, Maubawk, Aizawl
    
    
    Member:
    1) ZD. Lalrinfela s/o ZD Lalnunmawia, Venghlun, Lunglei.
    2) Debbie Lalrinawmi d/o Fredy Lalremruata, Ramthar North, Aizawl.
    3) Rosiamliana Ralte s/o Lalrila, Zotlang, Aizawl.
    4) Rinngaia Colney s/o Vanlallawma (L), Hlimen, Aizawl.
    5) Lalbiakzami Pachuau D/o Lalchungnunga (L), Tuirial Airfield
    6) Lalsawmvela S/o Vanhnuaithanga, Ramhlun Venglai
    7) KC Lalthansanga S/o Ginzalama, Mission veng
    8) Lalnunsanga S/o Lalmuana (L), Vanghmun, Zampui tlang
    9) JD Mawia S/o Lallawma (L), Vanghmun Zampui tlang
    10) Dustin Lalkulhpuia S/o Lianzama, Behliangchhip, Tripura

17. MAL hruaituten hlawhtlinna an dawn thu: MAL hruaitute zinga mi Pu Darchuailova Renthei, Pu H. Laldinmawia leh Nl Lalhlimpuii te chuan chuan Mizoram University hnuai atangin Doctorate Degree (Ph.D) an sual chhuak ta a. An hming bulah, ‘Dr’ an dah thei ta bawk. MAL chuan Dr. Darchuailova Renthlei, Dr. H Laldinmawia leh Dr. Lalhlimpuii te hi kan lawmpui hle a ni. Tin, Revd Chuauthuama chuan December 4, 2021-a Serampore College (University) Convocation-ah Doctor of Divinity (Honoris Causa) a dawng a. DD Degree an pêk chhan an ziah chu outstanding and distinctive Mizo Church Leader, Biblical Scholar, Theologian and Prolific Writer tih a ni a, Revd. Dr. Chuauthuama pawh MAL chuan kan lawmpui tak zet a ni.
    
18. Professor Laltluangliana Khiangte MAL Doner Member in Sangeet Natak Akademi Award 2018 a dawng: Professor Laltluangliana Khiangte MAL Doner Mem ber leh MAL hun rei tak hruaitu pawh lo ni thin chuan India ram Vice President hnen atangin ni 9. 4. 2022 khan Sangeet Natak Akademi Award 2018 for Playwriting chu a dawng. MAL hruaitute zingah hetiang lawmman dawng thei an awm hi a lawmawm hle
    
19. Puipate leh Pu Lalchhandama Ralte Minister, Education and Human Resources te an inkawm: Pu Lalchhandam Ralte Minister, Education and Human Resources chuan Mizoram Legislative Assembly Session hnuhnung ber a lungrual taka pawm tak “Mizo Language Development Board Bill 2022” lawm nan thingpui inho turin ni 24 March 2022, dar 1:00 Pm khan MAL puipate chu a pisa a leng turin min sawm a. He hunah hian MAL Puipate pawh kim taka kalin, puipate chuan Pu Lalchhandama Ralte Education Minister leh Pu L. Thangmawia Vice Chairman, Human Resource Development Board ten Mizo Language Development Board a pian theih nan theihtawp chhuah a tan an lak avanga an lawm ziate, Mizo Language Development Board Bill 2022 hi lungrualna bill nia an hriat thute leh Mizo tawng tihmasawnna tur a nih mai bakah zofate min hnuk khawmtu tur a nih avangin tha tak a kal chho zel tura an duh thu an sawi hlawm a ni.
    
20. Seminar, Workshop leh Symposium: MAL rawngbawlna pawi mawh tak pakhat chu thupui thlan bik hmanga Seminar, Workshop leh Symposium te buatsaih hi a ni. Heng hi fund awm theih dana zirin a buatsaih thin. Hengah hian Art & Culture Deaprtment, Mizoram chhung leh Pawl dangte bakah Sahitya Akademi leh Sangeet Natak Akademi te nen thawh ho thin a ni. Chutih rual chuan, ama pualin emaw Sawrkar Department then khat thawhpuiin emaw, Drama Writing Competition te, Poetry Writing Competition te, Story Writing Competition te a huaihawtin, endiktu-ah tangin sawrkar leh Pawl dangte pawh a thawhpui bawk thin.
    
21. Rorel thutkhawm zat : Report chhungah hian Puipate thut khawm tum 1 leh EC thut khawm tum 4 a awm a ni.
    
    
    Ka lawm e.

(Hei hi Dr. Zoramdinthara, Secretary, MAL-in April ni 15, 2022-MAL Foundation Day hmannaa a report a ni).