MAL Diamond Jubilee & Kum Tawp Intawhkhawm Report

 A hun : Ni 29.11.2024 (Zirtawpni)

A hmun : Pi Zaii Hall, Synod Conference Centre, Aizawl
Report petu: Dr. Zoramdinthara, General Secretary, MAL Gen. Hqrs.

Pu Chairman, MAL President, Prof. RL. Thanmawia, kan Khuallian zahawm tak Pu C. Lalsawivunga, Minister, Art & Culture Department, MAL hruaitu, Sr. Advisers, Donor Members, EC Member, MAL Joint Headquarter , MAL Branch leh Affiliated Club aiawh, vawiina kan sawm bikte, MAL Member leh thian duh takte u, MAL Diamond Jubilee leh MAL Kum Tawp Intawhkhawm 2024 chibai ka buk a che u. Kum 2023 MAL Kum Tawp Intawhkhawm leh kum 2024 Kum Tawp Intawhkhawm inkar hian pawl chetvelna hrang hrang leh pawl chhunga thil thleng a awm a. Chung pawl chetvelna leh thil thleng chu hetiang hian a tlangpui lo tarlang ila. .

1. MAL hruaitu hlui leh EC Member boral thu:  Ni 27^th December 2023 zing dar 3:45 khan Prof. Darchhawna kum 87 chuan chatuan ram min pansan a. Ni 27^th December 2023 chawhnu dar 1:00 khan Kulikawn YMA Hall ah vui a ni. Prof. Darchhawna uina thu hi pawl hmingin Prof RL. Thanmawia, President MAL chuan sawi a, Nl Lalsangpuii, Treasurer MAL chuan pawl hmingin a ruang chungah pangpar a dah bawk. Prof. Darchhawna MAL hruaitu hlun, MAL chawimawina sang Academy Award 2004 leh Padma Shree 2005 pawh dawngtu vuinaah hian MAL member kal pawh kan thahnemin, MAL Member kalten thla an lakpui bawk a ni.
   
   
   Vanduaithlak takin Revd. Dr. Chuauthuama, MAL EC Member leh Thu leh Hla Editor ni lai chuan ni 4 January 2024 zan dar 10:20 khan chatuan ram min pan san thut mai a. Revd. Dr. Chuauthuama boral thu hian MAL member-te min thawng hle. Ni 5^th January 2024 chawhma dar 11:00 a vuina hun a chenna ina neih a nih hma deuhin. Revd. Dr. Chuauthuama ruang chungah hian MAL Vice President Prof. Rualkhuma Colney chuan MAL aiawhin pangpar a dah a, Revd. Dr. Chuauthuama uina thu a sawi bawk. Revd. Dr Chuauthuama vuinaah MAL Member kal an thahnemin, MAL member kal ten thla an lakpui bawk a ni.
   
   
   Ni 31^th March 2024 zing dar 1:00 khan Pi Vanhlupuii kum 77, MAL EC Member hlui leh MAL Member chuan chatuan ram min pan san a. Hemi ni vek chawhnu dar 1:00 khan Dawrpui Multipurpose Hall ah vui a ni. Pi Vanhlupuii uina thu hi pawl hmingin Prof. Rualkhuma Colney, Vice President MAL chuan a sawi a. Tin, pawl hmingin a ruang chungah pangpar a dah bawk. Pi Vanhlupuii vuinaah hian MAL member kal pawh kan thahnem hle.
   
   
   Pu Zohmangaiha MAL Member leh EC Member hlui chuan ni 20 April 2024 zan dar 8:00 khan chatuan ram min pan san hlauh mai a. A vuina hun ni 21 April 2024 chawhnu dar 3:00 a an chenna Chhinga Venga neihah hian MAL Vice President Prof. Rualkhuma Colney chuan a ruang chungah pawl hmingin pangpar a dah a, pawl aiawhin Pu Zohmangaiha uina thu a sawi bawk. Pu Zohmangaiha vuinaah hian MAL EC Member leh Member kal an thahnem hle.
   
   
   Dr. B. Thangdailova, MAL Life Member chuan ni 19 July 2024 zing dar 3:30 khan chatuan ram min pansan hlauh mai a. A vuina hun ni 19 July 2024 chawchnu dar 1:00 khan a chenna in Upper Khatlaah neih a ni a. Dr. B. Thangdailova boral thu hian MAL min thawng hle mai. A vuinaah hian Pu Lalhmingmawia Ralte, Fin. Secretary, MAL chu pawl aihawhin a tel a ni. Dr. B. Thangdailova vuinaah hian MAL EC Member leh Member kal an thahnem hle.
   
   
   Tin, vanduaithlak takin Pu Isaac Zoliana, Mission Veng, MAL Life Member pawhin ni 25^th July 2024 zan khan chatuan ram min pan san ve leh hlauh mai a. Ni 26 July 2024 khan Pu Isaac Zoliana ruang chungah hian Dr. Zoramdinthara, General Secretary, MAL chuan pangpar dah a, pawl aiawhin uina thu a sawi bawk. Pu Isaac Zoliana vuina Mission veng Kohhran Hall-ah hian MAL EC member leh MAL member kal an thahnem hle. Kumin hian MAL member hlun tak tak leh pawl tana mi tangkai kan chan hnem hle mai.
2. Pu Lalhmingliana Saiawi lungphuna tel thu: Pi Thankhumi w/o Pu Lalhmingliana Saiawi leh a fate chuan hnen atangin kum 2016, June ni 6 a boral ta Pu Lalhmingliana Saiawi lungphun ni 28^th December 2023 dar 2:00 a Tourist Lodge, Chaltlanga neih tur hriatirna kan dawng a, He hunah hian pawl aiawhin Prof. Rualkhuma Colney, Pu Lalhmingmawia Ralte leh Pu Laizawna te an tel.
   
3. Minister, Art & Culture leh MAL hruaitute inkawm thu: Ni 23 January 2024 khan Pu C. Lalsawivunga, Minister, Art & Culture chu MAL hruaituten a Office-ah kum thar chibai an buk a. He hunah hian Minister leh MAL hruaitute chu inpawh taka inkawmin, pawl dinhmun leh hmathlir hrang hrang an sawi ho va. Minister, Art & Culture hian sawrkar kum 2025-2026-ah MAL Grant in Aid chu budget a dah ngei tura ruahmanna siam a tum thu leh MAL hruaitute pawh a tul anga bengvar zui zel turin a sawm nghe nghe a ni.
   
4. Chairman, Mizo Language Development Board leh MAL hruaitute inkawm thu: Ni 29th January 2024 khan Pu R. Lallianzuala, Chairman, Mizo Language Development Board chu MAL hruaituten a Office-ah an kawm a. Pu R. Lallianzuala chuan ‘Thu leh Hla’  hmasawnna tura hmalakpui zel a tum thu pawl hruaitute hi a lo hrilh a ni. 
   
5. Meichher Award semna a MAL hruaitute tel thu leh MAL Senior Adviser-in Meichher Best Contributor of the Year 2023 dawn thu: Ni 9th February, 2024 khan Adult Education Wing, Directorate of School Education buatsaihin, Directorate of School Education Conference Hall, Aizawlah ‘Meichher Award 2023’ semna hun hman a ni. He huna tel tur hian Pu Lalsangliana, Director, School Education chuan MAL hruaitute min sawm a. Pawl aiawhin Prof. Rualkhuma Colney chuan thu tawi sawina hun a hmang a. Pu Lalhmingmawia Ralte, Nl Lalsangpuii leh Dr. Zoramdinthara te pawh he hunah hian an tel a ni. He huna khuallian Dr. Vanlalthlana, School Education Minister chuan Education Department buatsaih thlakip chhuak ‘Meichher’ chanchinbua thu leh hla ziak tha (Meichher Best Article of the Year 2023) leh thu leh hla thawh hlawk (Meichher Best Contributor of the Year 2023) lawmman dawngtu mi 10 te hnenah chawimawina a hlan a. Pu Thansanga Chawngthu, Senior Adviser, MAL chuan Meichher Best Contributor of the Year 2023 lawmman pathumna a dawng a. He lawmman hian Rs. 1000 leh chawimawina thuziak a keng tel a ni.
   
6. Mizo Language Development Board atanga Thu leh Hla chanchinbu chhutna tur dawn thu: Ni 4th April 2024 khan Pu R. Lallianzuala, Chairman, Mizo Language Development Board hnen atangin ‘Thu leh Hla’ chanchinbu chhutna tur (Publication Grant) Rs. 50,000/- MAL min pe a, Thu leh Hla chanchinbu hmasawnna tura mi inphal kan nei hi a lawmawm hle..
   
7. MAL Din Champha leh MAL Diamond Jubilee hawnna tluang taka hman a ni: Mizo Academy of Letters (MAL) chuan ni 23 April 2024 khan MAL pawl din champha leh Diamond Jubilee lawmna chu tluang takin Chanmari YMA Hall-ah hman a ni a. BoY hlanna inkhawm ni paha MAL din champha leh Diamond Jubilee lawmna inkhawm hi MAL President, Prof. RL Thanmawia chuan a kaihruaiin, Pu J. Malsawma, MAL hruaitu hluiin Diamond Jubilee hawnna thu record sa a sawi chu chairman chuan mobile phone-ah tichhuak leh chhawngin Jubilee chu a hawng a. MAL General Secretary Dr. Zoramdinthara chuan pawl chet velna tawi a sawi bawk. Dr. H. Laldinmawia, MAL Asst. General Secretary chuan MAL Diamond Jubilee lawm tura MAL inbuatsaih dan hrang hrang a tarlang bawk. Dr. Lalzarzova, Secretary, Book of the Year 2023 chuan Book of the Year 2023 report tlangpui a sawi zawhah khual lian Pu JH. Zoremthanga, Chairman, MBSE chuan Pu B. Lalthangliana lehkhabu ziah ‘Ka Lungkham’ leh MAL buatsaih ‘An Sulhnu Thu leh Hla’ tih chu a tlangzarh nghal a. Khual lian Pu JH. Zoremthanga chuan Book of the Year 2023 lawmman dawngtu ‘Pangparhnima’ tih ziaktu Ahmangaihi Khiangte hnenah ‘Book of the Year 2023’ chawimawina a hlan a. Chawimawina hian thuziak chei (Citation) leh tangka fai Rs. 10000 a keng tel a ni. He huna khual lian Pu JH. Zoremthanga, Chairman MBSE chuan thu leh hla tha ziah hi mi zawng zawng tih theih a nih loh thu leh thu leh hla ziakmite chu thu leh hla tha, thangtharte nun kaihruai thei tur ziak zel tura a duh thute, thu leh hla tha kan neih tam hi ram hmasawnna tur a ni thu leh Book of the Year 2023 ziaktu pawh thinlung taka a lawmpui thu a sawi bawk. MAL din champha lawmna leh Jubilee hawnna inkhawmah hian MAL member leh Affiliated club Member an kal tha hle a ni. MAL EC Member, Pu Lalrammawia Ngente chuan lawmthu sawina hun a hmang thung a ni. Chawhnu lamah MAL Diamond Jubilee pual seminar MAL leh MBSE tangkawp buatsaih a chu hman a ni a. He seminar hi Prof. Rualkhuma Colney, MAL Vice President chuan a kaihruai a. Thupui thlan pahnih ‘Tunlai Mizo Thu leh Hla Thlirna’ tih chu Dr. H. Laldinmawia, Asst. General Secretary, MAL chuan a sawi a. ‘Mizo ṭawng kalhmang: Linguistic lam aṭanga thlirna’ tih chu Dr. Laltleipuii, EC Member, MAL chuan a sawi bawk.
   
8. Meichher Golden Jubilee Organising Committee a tel thu: Ni 8 April 2024 khan Meichher Golden Jubilee Organising Committee chu Committee Room, Directorate of School Education, Aizawlah a thukhawm a. He hunah hian Dr. Zoramdinthara, General Secretary MAL chu pawl aiawhin a tel a ni. Meichher Golden Jubilee Organising Committee hnuaia Committee peng (Sub-Committee) ah Dr. H. Laldinmawia, Asst. General Secretary leh Dr. C. Lalawmpuia Vanchiau EC Member te ruat an ni bawk.
   
9. Rev. Lalbiaknia, Editor, Synod Literature & Publication Board hnen atanga sawmna kan dawn angin, Synod House Style en thatna kalpui mek inrawn khawmna ni 23 May 2024 (Ningani)-a neihah MAL aiawhin mi panga (5) pawl aiawhin an kal a. Chungte chu:- 1) Prof. RL. Thanmawia 2) C. Chhuanvawra 3) Pu B. Lalthangliana 4) Dr. H. Laldinmawia 5) Pu F. Vanlalrochana.
   
10. R. Lalrawna, MAL Member leh Rozama Chawngthu MAL EC Member hnenah Sahitya Akademi Bhasha Samman Award 2021 & 2023 hlan an ni: Sahitya Akademi-in India ram chhunga hnam hrang hrang tawng tih hmasawn leh hausak kawnga thawk tha chawimawina, ‘Sahitya Akademi Bhasha Samman 2021 & 2023’ dawng turin Pu R. Lalrawnna leh Pu Rozama Chawngthu chu a thlang a. He chawimawina dawng tura thlan an nih thu hi ni 15 June 2024 khan Hotel BrG Budget Stay, Narmada, Gujarat hmun a General Council Meeting, Sahitya Akademi neih tumin Dr. K. Sreenivasarao, Secretary, Sahitya Akademi chuan a puang a. He Sahitya Akademi chawimawina sang dawng tur hian Pu R. Lalrawna leh Pu Rozama Chawngthu hi India danpui scheduled language a tel lo tawng zingah Mizo tawng tih hmasawn leh tih hausak kawnga an thawhhlawk avangin thlan an ni a. He chawimawina hian chawimawia thuchei, dar a cheimawi bakah pawisa fai Rs 100, 000 a keng tel a. He chawimawina hlanna hun hi ni 29^th August 2024 tlai dar 5:00 khan First Floor Auditorium, Rabindra Bhavan, 35 Ferozeshah Road, New Delhi ah hlan an ni.
    
11. EC Member lehkhabu tlangzarhna a sawm thu leh tel thu: Pu C. Lalnunchanga, MAL EC. Member chuan a nau boral ta C. Ramdinmawia lehkhabu ‘Hringnun Thawnthu Ril’ tih tlangzarhna hun ni 22 June 2024 a Bawngkawn Chhimveng YMA Hall a tel turin MAL EC Member-te min sawm a. He hunah hian MAL Member leh EC Member thenkhat kan kal a ni. Ni 26 June 2024 khan C. Lalmuansanga, Bethel Veng, Champhai chuan  a lehkhabu ‘Zo Than Tlang’ tih tlangzarhna MPSOA Hall, CID Complex a tel turin MAL EC. Member-te min sawm a. Prof. Rualkhuma Colney, MAL Vice President leh EC. Member thenkhat he hunah hian an tel thei a ni. Tin, ni 17^th July 2024 khan Zoremi Zote chuan a lehkhabu ‘Awmhar Khawnvar’ tih tlangzarhna, Chanmari YMA Hall a neih tur a tel turin MAL EC. min sawm bawk a. He hunah hian Prof. Rualkhuma Colney, Vice President Pu Lalhmingmawia Ralte, Fin. Secretary leh MAL EC. Member \henkhat an tel bawk a ni.
    
12. Art & Culture Department huaihawt a neih tur Thu leh Hla Kutpui Committee a MAL hruaitute tel thu leh MAL hruaituten Minister, Art & Culture hmuh thu: Ni 5.7.2024 khan Pu C. Lalsawivunga Art & Culture Minister leh Art & Culture Department hotute chu Mizo Academy of Letters hruaitute nen Art & Culture Minister pisa-ah ni 29 October 2024 a Govt. Champhai College a Art & Culture Department bultuma hman tur ‘Thu leh Hla Kutpui’ hman dan tur leh ‘Mizo Thlangtlak dan Zirchiana seminar hman dan tur an sawiho a. He hunah hian MAL pawl hruaitute an tel kim thei a. He seminar neih turah hian Prof. Malsawmliana MAL Member leh Dr. Malsawmdawngliana chu thupui ziak tur a ruat an ni. Dr. Zoramdinthara Gen. Secretary leh Dr. H. Laldinmawia, Asst. Gen. Secretary, MAL-te chuan Seminar an kaihruai dawn bawk a ni. Tin, he inhmuhkhawmah hian MAL Pawl hruaitute chuan Minister hnenah MAL Diamond Jubilee lawmna senso Rs. 480,000.00 dilna an thehlut nghal a. Vanneihthlak deuhin Jubilee lawmna senso tur hi Minister hian Art & Culture Department kaltlangin pek kan nih tur thu min hrilh a. MAL hruaitute chuan lawmawm kan ti hle.
    
13. Mizo Academy of Letters chuan Instagram leh Facebook account a nei thar: Pu F. Vanlalrochana leh MAL EC Member thenkhat thahnemngaihna zarah MAL chuan Instagram leh Facebook Account a nei thar a. He Instagram leh Facebook account-ah hian MAL chetvelna hrang hrang phochhuah niin, he Instagram leh Facebook zawm tan chuan MAL chet velna a hmuh zung zung theih a ni. Tin, MAL Website pawh IT Committee hmalaknain tihchangtlun chhoh zel a ni a. A ni telin tlawhtu pawh an pung chho zel a ni.
    
14. Seminar a tel thu: Pu Gen Khan Do, Senior Research Officer hnen atangin ni 25^th – 26^th July 2024 a ICFAI University a neih tur ‘Mizo Tobul Chhuina’ Seminar a tel tura sawmna kan dawng a. He hunah hian Prof. Rualkhuma Colney, Vice President, Pu Lalhmingmawia Ralte, Fin. Secretary leh EC Member Pu B. Lalthangliana, Pu Lalrammawia Ngente leh Pu Zothansanga chu pawl aiawhin an tel a ni.
    
15. Kumin hi MAL kum 60 tlin kum Diamond Jubilee a nih avangin MAL Executive Council chuan Diamond Jubilee hi lawm ngei ni se a tih avangin a lawm dan tur ruahmanna siam tur Committee hrang hrang a din a. Chung Committee peng hrang hrang chu – Lehkhabu Pho Chhuah Runpui Committee, Chhuahtu leh Tlangau Committee, Intihsiak Committee, Sum Tuak Committee, Ei leh In Committee leh Khualchhawn Committee te a ni a. Heng Committee hrang hrang te hian MAL Diamond Jubilee hlawhtling taka lawm a nih theih nan leh thangtharin Diamond Jubilee an hriat reng theih nan mahni hma zawn theuh ah theih tawp chhuahin an bung chho zel a ni.
    
16. Meichher Golden Jubilee Organizing Committee a tel thu: Dr. Vanlalthlana, Minister, School Education hovin ni 27 August 2024 khan a pisa-ah ‘Meichher Golden Jubilee Organizing Committee pui’ an thukhawm a. He hunah hian MAL hruaitute chu sawm bik zingah telin an kal a. Tin, Meichher Golden Jubilee Organising Committee hnuaia Committee peng (Sub-Committee) a tel EC Member- Dr. H. Laldinmawia, Asst. General Secretary leh Dr. C. Lalawmpuia Vanchiau an tel bawk.
    
17. MAL Branch leh Joint Headquarter thar din thu: Chhimtuipui Academy of Letters leh Ramhlun Literature Club te chu MAL dan thar angin  MAL Joint Headquarter leh Branch ni hmasa ber an ni ta a. Prof. Chawngkhuma Chawngthu, President Chhimtuipui Academy of Letters hnen atangin MAL General Headquarters zawm dilna kan dawng a. Chhimtuipui Academy of Letters hi District level-a pawl ding an ni a. MAL danpui thar angin “MAL Joint Headquarters ah pawma ni a. Pu C. Laizawna, Ramhlun Literature Club Secretary hnen atangin MAL General Headquarters-a Branch nih dilna kan dawng a. An ang hian MAL Branch ah pawm a ni bawk. MAL Danpui tharin a sawi angina Literary Association an awm na hmasa a “Life member” lo ni tawh sate chu MAL General Headquarters-ah “Life Member”-a pawm nghal tur an ni a.
    
18. Thu leh Hla Kutpui (Literary Festival) tluang taka hman a ni: Art & Culture Department bul tuma Art & Culture Department, MAL leh Government Champhai College-te buatsaih ‘Thu leh Hla Kutpui Seminar on Zofate Thlang tlak zir chianna’ tih chu ni 29 October 2024 khan Multipurpose Hall,  Govt. Champhai College-ah tluang taka hman a ni a. Pu C. Lalsawivunga, Hon’ble Minister, Art & Culture Department etc. chu khuallian niin nilengin he seminar hi min uap a. ‘Thu leh Hla kutpui’ hawnna inkhawm hi Pu VL. Remliana, DC. Champhai chuan a kaihruai a. Pu F. Lalthanmawia, Dy Director, Art & Culture Department chuan Report pein, Khuallian Pu C. Lalsawivunga chuan Seminar hawnna thu a sawi a. Pi Zonunthari, Joint Secretary, Art & Cuture Department chuan lawmthu sawina hun a hmang bawk a ni.  Khuallian Pu C. Lalsawivunga chuan Seminar hawnna thu sawiin, “Mizote hian kan history kan ngaih pawimawh thar a, history dik nei tura tan kan lak a tul a, tuna ke kan pen loh chuan thang lo thar zel tur kan thlah te chu history hriatna kawngah an dal ang a, hawi lam tur bik hre lovin an darh nuai mai ang tih a hlauhawm a. Tun hi tan kan lak hun chu a ni a, Art & Culture Department chuan theihtawpin hma kan la a ni,” a ti. Art & Culture Department leh MAL te buatsaih ‘Thu leh Hla Kutpui’ Govt. Champhai College-a neihah hian ‘Zofate thlang tlak dan zir chianna’ tih chu thupuiah hman a ni a. Chawhma huna thupui zirhona hi Dr. Zoramdinthara, Gen Secy. MAL-in a hruai a, “Zofate thlang tlak dan – Lungphun hmanga zirchianna’ tih thupui hmang a Prof. Malsawmliana, Dept. of History, Govt., T. Romana College paper ziak chu ngaihthlak a ni.
    
    
    Chawhnu hun hi Dr. H. Laldinmawia, Asst. Gen. Secy., MAL in a kaihruai a, ‘Zofate thlang tlak chhan leh an thlang tlakna kawng’ tih thupui hmanga Dr. Malsawmdawngliana, Asst. Professor, Dept. of History, Govt., Aizawl West College paper ziah chu ngaihthlak a ni a. Heng thupui te hi sawihona tha tak neih chhunzawm a ni. He huna sawihona hun hi seminar chhimtuten an kham lo hle. Pi Carol VLMS Dawngkimi, Director Art & Culture Department chuan Seminar kharna programme a kaihruai a. He Seminar-ah hian mi 275 zet an tel a ni. Thu leh Hla Kutpui-ah hian Mizoram Publication Board, Art & Culture Department chuan lehkhabu an tih chhuah tawh eng nge maw zat an pho chhuak bawk. He seminar hi mipuiin an hlut hle. He seminar hi Pu C. Laizawna, MAL EC member pawhin a chhim a ni.
19. MAL Grant in Aid recurring a dawng tura bawhzui thu: Kum bula MAL hruaitute leh Minister, Art & Culture inkawm tuma Minister-in tawngkam tha a lo hmuh chu umzuiin, ni 1 November 2024 khan Pu C. Lalsawivunga, Minister, Art & Culture hnenah Art & Culture kaltlang a MAL in tanpuina sum kan dawn thin chu a thar a dil buai ngai lo a, budget a Rs. 400,000 min dah sak tura dilna kan thehlut a. Minister hian theihtawp chhuah a tum niin kan hria.
    
20. Lehkhabu kan dawn thu: Heng a hnuaia mite hnen atang hian lehkhabu kan dawng:
    
    
    Hring Nun Lamtluang : Upa V.Lalchhawna (3 copies)
    Bengkhuaia Sal atangin Zalenna Ramah : T. Sena Ralte Siakeng (1copy)
    Pathian Thuruk Inthup : Lalramzauva Ralte (1 copy)
    Ralte Hnam Chanchin : Lalramzauva Ralte (1 copy)
    Hisslam Silver Jubilee Souvenir 1997-2022 : Lalhmingmawia Ralte (1Copy)
    Hrui Kum Lo Rimawi : C. Januari (1 copy)
    Fin Khawm : MAL. Jt. Hqtrs, Lunglei (2 copy)
    Thlirtu Khawthlir : Rsa Thawmte(1 copy)
    Ka hla phuah leh lehlinte : Rozama Chawngthu (2 copies)
    Pu M. Suaka- Durtlang Lal Chanchin : Dr. C. Lalawmpuia Vanchiau (1copy)
    Theuneu : Laldawngliana (1 Copy)
    Chuailo bu 5-na : RL. Thanmawia (1 Copy)
    Wayne Cole (3 Vol) : Joe Ngurdawla (1 Copy)
    Ka Ngawi Thei ta Lo E : Lalsangzuala (2 Copies)
    The Three Musketeers : Rozama Chawngthu (2 Copies)
    Sulhnu leh Nun Hlui : Lalnunthara Sailo (2 Copies)
    The Laymen’s New Testament Commentary : F. Lalthanzuala (1 Copy)
    Ka Rawn Fang  : C. Laizawna (1 Copy)
    Oliver Twist     : C. Laizawna (1 Copy)
    Treasure Island : C. Laizawna(1 Copy)
    Awma ka ta : C. Zodinmawii (copy 1)
    Ziah chhan : Piangloi Pa (copy 1)
    Ka Rahbi : C. Lalthlamuana (copy 1)
    Manipur Rambuai : Tluanga Chhakchhuak (copy)
    Pangparhnima : Ahmangaihi Khiangte(2 copies)
    Kan rawngbawlna leh Martar nula Rohmingthangi : F. Lalhlira (1 Copy)
    Suabgtuahna Piah Lam   : Rinfela Zadeng (1 Copy)
    Mizoram Political History (1890-2023)   : C. Lalaudinga (1 Copy)
    Mizoram Buai leh Kawlphai Zofate   : K. Krawsthanga (1 Copy)
    Tunlai Khawvel Thlirna   : Vanneihthanga (1 Copy)
    Kehi Yaadgar Chhanharu : Purna Prasad (1 Copy)
    Mizoram Anu Gorkhahura : Purna Prasad (1 Copy)
    Mizo Thuruchun)Folklore : Dr.Laltluangliana Khiangte (1 Copy)
    Lemchan khawvel-4   : Dr.Laltluangliana Khiangte (1 Copy)
    Zonu Cheipar-3: Hmeichhe Thianghlim Lalruali :  Dr.Laltluangliana Khiangte (1 Copy)
    Lalruali leh Capt. LZ. Sailo Birth Centenary/ Zacham lawmna : Dr. Laltluangliana Khiangte (1Copy)