Mizo Academy of Letters (MAL)-in kum 60 tlin lawmna (Diamond Jubilee) puala Aizawl Vanapa Hall-a Pho Chhuah Runpui a buatsaih chu, vawiin November ni 25, Thawhtanni hian MAL Donor Member, Prof. Laltluangliana Khiangte chuan a hawng. November 29, 2024 (Zirtawpni) thleng neih a ni ang.
Pho Chhuah Runpui-ah hian Aizawla lehkhabu dawr hrang hrang 23 leh mi mal lehkhabu nei mi 10 chuangin an lehkhabu an pho chhuak a. Heng lehkhabute hi man tlawm zawka hralh chhuah a ni. Lehkhabu bakah hian Mizo ziak mite kutziak leh an hmanraw hlui te, Mizo Academy of Letters-in Academy Award a lo hlan tawh te, MAL Book of the Year lo dawng tawhte thlalak leh an lehkhabute pho chhuah a ni a, a duh tan lei theih a ni bawk.
Pho Chhuah Runpui hawn inkhawm hi MAL president, Prof RL Thanmawia chuan a kaihruai a, Pu H. Lalawmpuia, Pho Chhuah Runpui Committee Secretary chuan report a pe a. Pho Chhuah Runpui hawngtu, Prof Laltluangliana Khiangte chuan, MAL-in kum 60 a tling ta chu lawmawm a tih thu leh Mizo thu leh hla hmasawnna atana a hnathawh chu ropui a tih thu a sawi.
MAL hi kum 1964 April ni 23 khan din a ni a, harsatna hrang hrang karah thang chho zelin, tunah hian member 500 dawn lai an ni tawh a. MAL danpui thar angin kumin atang hian an pawl inrelbawl dan thar angin, General Headquarters pakhat, Joint Headquarters 3 leh branch pakhat an nei mek a, MAL zawmtu hi an la pun belh zel a ni.
MAL Diamond Jubilee lawmna pui ber hi November ni 29, 2024 (Zirtawpni) hian Pi Zaii Hall, Synod Conference Centre-ah hman a ni dawn a. Art & Culture Minister, Pu C. Lalsawivunga chu khual lian a ni ang.
0 Comments